Pierre Savorgnan de Brazza, francaf vestasik, bak 1852 koe Roma kobliyir aze bak 1905 koe Dakar awalkeyer. Pasuson vas guazafa italiafa yasa, tuke nendara ke Montaignac rambik, wetce diveik va Brest Biratotarafa Bema az francafa birarpolia denfir. Bal totara wetce pomarafayik ke Quiliot rambik ( 1873-1874 ), va Gabona worayar. Abduaskiyinon wetce totararikulik, bak 1875 va vuida ta vestara va Ogooué bost seotayar acum do Marche tuwavopik is Ballay selaropik is Hamon totaralevfayik mallapiyir ; Marche me rotartlapiyir. Inaf dositikeem va Ogooué bost ticlapiyir : vestason va kenexoeem ise xultuson va jontika volfakaca ise nepaleson va seroluca ke irubasikeem. Brazza va Ogooué bostxo remigayar aze va Alima is yona Licona kovoa ke Congo bost kosmayar ; voxe me grupeyer da lion poke bat bostap tigiyir acum arte 1300 km ko Gabona di dimlapiyir. Ba dimpira ko Franca zo tufrancayar. Givayanon icde kosmakseem ke Stanley ise grupeson va vakoreem weyonas va totara moo vatitefo Congo, va keldonara van bost mal Gabona francafo digixo gorayar. Ba 27/12/1879 vuidayanon gan Divexo Elda mallaniyir aze va Ogooué bost vaticlapiyir aze kene kovoa ke Mpassa kuksa va Franceville recela reduyur ( 6-aksat 1880 ). Va Stanley Pool uzdaka azon kallaniyir aze va Makoko gazik gorayar enide bantan va int rundayar koe nendareba ke Franca ( 03/10/1880 ) ; kene bost in va recela yoltkirafa gu Brazzaville reduyur aze va Malamine levfayik koeon iskeyer. Va Congo bost radimion vatitlapiyir aze va Stanley kakeveyer aze bak 12-aksat ke 1880 ko Gabona artlapiyir. Bak 1881 va Alima play reduyur, azon va Niari kuksa ticlapiyir, va tela lotrelafa kelda wale mialukafo Congo is krimta ( 1882 ). Bak 6-aksat ke 1882 koe Franca tigiyir lize va seramafa rekluera kazawayar. Inafa taniafa abdikerelera ta tarutera va kota koboda kev patectikeem, is opafa adala ke abickane geltran vestareem ravalduyud tori in va vamoeaca tove Stanley dan dum kevlik va in askipeyer ise tizon lutsagayar. Bata ovakiskafa lickuca, kiren kosmakseem ke Brazza me denon tir rodolunyen do tel ke Stanley, va saneuca ke Brazza anton tulogijayar. Maga pu in va erbonaxa brudayar ; in wetce totararikulik al abduaskiyir, azon bak 3-aksat ke 1883 wetce Sokasaneramisavik tolpiyir. Bak 3-aksat 1884 va Makoko kazokeveyer pu dano va gruyera va bioga ke 1880 tusaneayar, aze va Alima vestayar aze ko Franca dimlapiyir aze ko Berlin laxa wetce ckanef pirdasik zo stakseyer. Bata bareafa brinuga, lotorigirapafa dam telyona abdifa, va yon maletiksap nazbayar, ke dan poruca va dokobasikeem ke Brazza pakon malfir ; jontika recela di zo reduyud ise patecta zo vestapayar isen inaf robeem zo vayackayar. Brazza ko boniaxo gire lapiyir enide bower ; enide warzafa koboda kev Biratotara Elda zo rotaruteyed, taneuca kapbure bowesik va Gabona pu in zo vanziliyir. Brazza wiyir va intaf dugeem ke ristusik gan yon boniaraf seltomap dan di kiewaskiyid enide bak 1898 mbi grifliyir. Bak 1905 dimlapiyison ko Kongoa, inafa vuida tiyir kogrupara va lonjereem ke batyon seltom. Arti konak aksat dimlapison awalkeyer. Brazzaville re kelu ke Kongoa poron gu in zo yoltayar. |
© MMXXIII Rich X Search. We shall prevail. All rights reserved. Rich X Search